NA’E ipi ura amarai ede. Sapoda kaina dahu nami mai mbere. Indoku da’bade ‘banggomi ‘doho ‘bune susana oro ‘ba mbere uma ra salaja, umbuna ntadi dou ro rangguda aka nggaro ra tolo. Pala, aip ede re roci denggana urare. Kampo nami ele sumpu rasa aka – ngge’e kaina aka e’di doro. ‘Do’du Ele ku ngarana. Doro ‘dese  ele mai ba rasa. Ta eseka wara rasa ngarana Wawo.  Ndede ja ta ‘da mai ba rasa. Doro nae ma ‘dese mboto fu’u haju. Di woha kampo wara sori na’e ‘bi’ana kampo. Kengge doro ore tolo wancuku  na’e na so ngguda kai ba dou fare. Wara rau dou ma ntadi uta aka ombo kengge rasa. Ore fu’u haju na, wuana caru maci. Busi colu ta aka. Wati ipi pana na bune rasa makalai. Nggori ‘bua ura sawa’u ba Ashar nami upa; Nadia, Erlin, nahu labo la Rara; losa aka katere kios dou.   

Akana wa’u nami ne’e lao ngaha caru aka salaja dou kengge tolo. Wa’u wara wa’a samba toma ra ka’dui ndawi ba ina nahu. Oha wa’a ba la Nadia. Pala ba bua ura ndadi sanawa ra nami re ni aka kengge kios ina la Arif  kompe jambata. Nggori ede tampu’ura lampa ra nami upa aka nganto tolo. Sanda re ‘ditewe aka rima, lampa mpa kani kopa e’di mpoa ‘ba dahu kai ma’bu aka nganto tolo. Pala la Rara ke tingawana si runcu sanda kone kau pabua ‘ba sia doho. Edempara paguna ni ma’bu kacobu lalo la Rara aka tolo fare dou. Waura ‘bini ba dana pacompo baju labo sarowa ra kanina. Ndede, ma’alumu kocu ncai nggori ura. Naka kakakaka, hari lalo mpa la Erlin, ndede wali nahu labo la Nadia. Tio na pahu nami re, na ncepa eli nangi la Rara. De mbora akaku nahu ‘bau nangi kandede kaina. Tu’u na ‘di pacompo, na naha na’e eli nangina.

De sia re lampa lao dula ni nangi selaho. Maja ade nami tio ‘ba dou aka ncai re. Nami ne’e lao karu’u aka wombo haju na’e kengge sori, kompe salaja. Wati sampe ademu ni, la Rara re dula lalo aka uma na. Rongga na ta uma na, la Rara ngoa na Dae na ma wunga nono kahawa aka serangge tando uma na. Edana ana siwe ma ‘bini ‘ba pacompo, wento dae na re ni. Watipu sodi ‘ba Dae na re, ngoa kaiba la Rara aka Dae na re;

“Sia doho. ngiiiiiiiiiiii”

“Cou?” sodi ‘ba Dae na.

“Cou wali si?!” cambe ‘ba  ma na ma ki’di aka ta ‘da ncai uma haju.

“Rakabune na nggomi?” so’di ‘ba Daena aka la Rara.

“Ra dunggi na mada. Ma’buku aka tolo, ngiiiiiiiiiii ”. Osana oi mada.

Ringa na edere na me’e padere pahu Dae la Rara. Inci na baju na. Katente kaciana tembe. Weha na tako o’o to’do kengge kuta uma. Lampa la ari na tio-tio selaho na nami.

Eda ‘ba nahu ni ka mbani pahu na.

 “Mai ta lao ncimi,” nggahi nahu ‘di sia doho dua.

Dae la Rara lampa ‘di la ele, ‘do la ‘da tio na nami.

Dae la Rara si ma na’e kente sarumbu, labo pahu si ma toku iraeeee, sengge kone kereku. Nahu, Nadia, labo la Erlin rai tampara awa kengge sumpu rasa Do’du ka. Ncimi kone ta fu’u fanda ma wara aka kengge uma dou kompe tolo. Dei ncimi kai ede wara lalompa kanggia la’bo karanggo kompe ma saki. De ngenge na nami doho re. Syukur nami re wati kanggicamu. Pai ndede na ringa ro na badeku nami ma cili weki ta aka ‘dei.

Dula di uma, nahu nggahi kai’ba ‘dou ma tuaku. Ndede wali sia ‘doho. ‘Bade nanami ma lao ncimi ngupa ‘ba Dae la Rara, na’e nawa na Ama nahu.

“Lao kai ncau Atun e,” so’di ao ’ba amaku wunga dula aimambia re.

“Mada lao ncimiku la’bo lenga ‘dohoku. Dahu ade ‘di Dae la Rara.”

 “’Babau ‘di dahu kaimu aka Dae la Rara?”

“Nangi anana ‘ba mbo’ona aka tolo. Ngupa na mada ‘doho kai cambo.”

“Koro kai ba sia ma na’e tua rawi dambe to’i ‘doho,” bede Ama nahu.

“Ndi aukaimu kalu’u kai asa,” kamawo ba Ina nahu Amaku ma mbani.

Ini nai kombi sawa’u ‘ba ede, nami doho eda angi wali aka uma sakola. Ndake lalo mpa nggahi la Rara ta nami;

“Ipija nggomi ‘doho edeni hari kaimu nahu ma mabu aka dana pacompo. Bune ja da ngoa kaimu nahu Daeku ‘ba nggomi doho ma hari ncau kai nahu.”

 Nggahi lalo la Nadia;

“Bune ja da hari kai’ba nami la’bo nggomi madangawa runcu sanda, lampa na’e gaya ma’bu lalomu aka dana pacompo, sampu kone baju ‘dohomu ba ‘bini’ba dana kareja. Edeni aina lampa roro, mo’da mbo’o kai.”

Nggahi wali ‘ba la Erlin;  

“Iyo ni. Kone ja ‘ba sato’i ede wa’u, nggomi re nangi lao ngoa lalomu Daem.”

Dula sakola, ou’ba la Erlin nahu labo la Nadia wati kaun dula la’o sia ede. Dula samara nami ‘doho tolu ke. Di woha ncai nuntu ka iha wali ra ba la Nadia labo la Erlin ke la Rara ma roci mbani.

 Ndake nggahi la Erlin;

 “Nahu watira ca’uku mpa’a labo la Rara ma roci mbani.”

Nggahi walip la Nadia;

“Iyo e, wati taho na mpa’a mbani ndede, au walip mpa’a ngoa dou ma tua na.”

Aimambia ra, ne’e nci’i ra liro ‘di ainain na makalai. Wunga dou tampu’u mpa’a voli aka lapangan kompe kanto kelurahan.  Nahu, la Nadia labo la Erlin lao weli pangaha aka kios Ina la Arif ma amba kompe jambata. Ade lao weli kaimu pangaha re, eda angi lalo nami labo Dae la Rara. Ne’e honcu lao rai nami pala ncarancua, tiwara ncai. Ndake nggahi dae la Rara;

“Oee ‘doho.”

Wedu kone e’diku nahu eda Dae la Rara, ne’e kone sampori tari’iku. Irae dohooe.

 “Mai wa’u si samporo nggomi ‘doho tolu re.” Ouna nami. Ese teka elina. Nahu naha dahu. “Au ka nangi kai menamu la Rara nggomi ‘doho? ’dunggi kabunemu ana nahu mena ‘bune ain na re?”

Cambekai  la Nadia;

“Mada ‘doho aip edere hari mpoampa Dae, pala wati mpa’a-mpa’a kaimu la Rara ma mbo’o. Hari bune kaisi lenga ma wunga ncoki. Mada ‘doho mahanta sia ma mbo’o, Dae.”

Nggahi wali ‘ba la Erlin;

 “Do’doku bune ta?” mbora akan.

“’Bune ta au nggomi ‘doho ma ‘dunggi La Rara?!”

“Santabe ta ndede ngoana ita ta? Mbeisi ba ita waktu mada ma kataroana,  ‘bune loa kai  na ma’bu la Rara aka dana pacompo aipu ede na re. Kombi si ncara ka ao ta. Ndakeku cerita ma podana, Dae. Mada doho upa ke lampa aka nganto tolo dou. Kan kocu Dae nggori ura aipu ede re. Ndadi kaina la Rara mabu lalon aka tolo fare dou ba dane’ena runcu sanda. Ede ta dae ‘ba kocu nganto tolo nggori ura. De mada doho we’di ni, ma’bu sia aka dana pacompo ede. Tiwara mada doho ma ‘dunggina ta.”  

“Ndedeku ro?”

“Iyo ta, Dae. Ndede ta,” cambe ‘ba nahu.

“La Rara nangi ka pa’i ade na si aip edere. Cou ma dapili ade ringa nangi ana siwe. Nggahi na ‘di nahu wara ma ‘dunggina. Wa’ude nggomi ‘doho mahari kaina.”

“Poda ni, Dae. Mada ‘doho hari pala wati ra dunggimu.” Ngoa ba nahu.

“Ndake ta dae,” Tala ‘ba La Nadia bune dou makadisa weki: “La Rara ka  nuntu cowan aka ita dae. Wati wara mada doho ma ‘dunggi na. Podan Dae, tiloa nuntu cowa. Au walip mada doho ke wa’ura ana Es Em Pe. Kone sato’i kaina wati wara tudu ‘ba mada ‘doho  ana ita. Kombi ndawi na ha sone kaina aka ita re dae. Ncokiku ndede, Dae. Sato’i-sato’i mpa’a ngoa ita doho ma tua. Pede re dahu lenga mpa’a la’bo.”

 Dae la Rara wiri tuta selaho, lampa dulan. “Wara-wara mena nggomi doho to’i ke anaeeee”.  Kaona tuta runcu songko.

Wa’ur nggori nuntu labo dae la Rara, dula ra nami aka uma mena. Ndede wali Dae La Rara, dula pakuna raba uma. Wati ipi mbani pahuna. Pala mbuipu wiri na tuta edan ana siwena ma doho tapa ncai. Ade dula kaiku re neo langgaku. Wati ipi mboto kananuku bune awi ra ‘didin. Ndede wali lengaku makalai.  

            Langi tampu’u wali ra rindin. Ha’di ai, ore apu ro bara marai.  Dou ma lao ntanda mpa’a voli ore madula sambura. Ne’e ‘bua ura ambina. Ai to’inmpa mai mbere lino wali bune pila nain, ncoki ru’u dou aka rasa; mboto dou mahi’do iha ntadi rontedi. Liro ncimi ili ‘ba apu. Ringaku ba robo aka sigi, caru lingga elina, sarerena ade. Roci-roci tauku oi aka embe ‘di weha kai oi sambea.

Eli ari moneku makanggica nangi ese uma, ‘ba’bau kombi. Inaku mbuipu doho sakadina  ari moneku. Amaku tu’u ki’di wehana songko sambea kai raterona aka paku kapenta uma sawatipu laona aka sigi.

“Wa’apu paju, Ama La Atune,” nggahi ‘batu ‘ba inaku aka amak.

Nahu wehaku oi sambea. Samonto La Rara ma mbo’o ‘di nganto tolo, ngoa cowa aka Daen. Doro ta ele ro ‘da mai ‘ba rasa naha naha rindi, dahu adek ndumba wadu ese doro. Tekaku ese uma ‘bama’bu ura ma na’e. Tiwara eli makalai aka kampo, dou midi mena. Ura makacorampa, na naha manaha.  **                                            

 *Siswi SMP Negeri 9 Kota Bima

Guru Pembina; Asri Nurani, S.Pd

 BIOGRAFI PENULIS

MISWATUN JUMRAH re nggana duampuru waru (28) November mbaana dua riwu ciwi (2009). Nasakolaku aka SMPN ciwi Kota Mbojo. Tampuuna tanao ro amppodena batu tuntu carita kai nggahi Mbojo. Ana cumpukaina, dua na saena. Waura batuna taji cerdas cermat Musium (LCCM). Umu na sampuru mbaa. Waura kapatu mbojo rauna aka acara Root Day Perundungan. Aka sakola na ntuwu juara. 

BIOGRAFI PEMBINA

ASRI NURANI re nggana duampuru waru (28) Juni mbaana sariwu ciwi mpuru ciwi ini (1996). Asri ana cumpu kai dari upa weki. Asri lulus ta universitas Muhammadiyah Mataram jurusa bahasa dan sastra Indonesia. Asri nda’di guru bahasa Indonesia ta SMPN 9 kota Bima la’bo tei rau ta Ponpes Ash shaddiqiah. Asri ore poda masa ncoki na ta kerawi na ndadi guru, pala ndaita ngeep ta kalampa  kerawina ra nee na aip toi waun.

 BIOGRAFI KURATOR

N. Marewo ngara tunti kaina Aminullah, ra nggana kaina ta mbojo dana sambawa mbaan sariwu ciwi ratu ini mpuru ini. Nggori sekolahna smp di mbojo sekolah walina SMA di yokyakarta. Ra mpaa tuntina cerita wunga kuliahna ta koran dikampus, wati kanggorina losa ba losa lao lampa rerona ta negara ta makalai. Mbaan sariwu ciwi ratu waru mpuru pidu nggee midi aka rasa berlin barat, jerman. Ra tanao kapodana nuntu jerman ta Harnackshule, volkschule labo di berliner sprachen istitut. Na waura tanao tunti drama wunga aip SMA wauna.